ОУ Страшо Пинџур
Дејноста образование во Вевчани се одвива во Општинското Основно Училиште "Страшо Пинџур". Опфаќа 250 законски обврзници и 30 вработени. Официјално, основното образование започна во 1835 година.
Во 1834 година, Вевчани се изборило за дозвола од турските власти за изградба на црква и отворање црковно училиште. Работело во ајатите на Долна црква. Првите учители требало децата да ги учат на грчки јазик, но ја користеле само грчката азбука, а со децата работеле на народен македонски јазик. Биле плаќани во натура од самото население, најчесто со жито.
Во 1868 година изградена е училишна зграда во дворот на Црквата "Свети Никола" (две поголеми училници и една канцеларија).
Вевчани кон крајот на XIX век станува се поинтересна зона на сите пропаганди (грчка, српска, бугарска), а училиштето - најсилно средство со кое треба да се однародува, денационализира и очисти македонското, најмилото, од детското срце.
Така и јазикот во вевчанското училиште се менувал:
- Од грчки на бугарски во шеесеттите години од 19 век
- Во 1896 година се учело на српски јазик
- Од 1897 до 1909 година на бугарски јазик
- До 1941 година српски јазик
Интересно е да се забележи и податокот дека во учебната 1890/91 година во Вевчани до 1898/99 година работи женското училиште "Надежда".
А од 1890 до 1909 година во Вевчани работи и забавиште. Во учебната 1902/03 година е направен обид за гимназиско образование во Вевчани. Се запишале 4 ученици кои го завршиле првиот клас и ги изучувале наставните предмети: божји закон, народен јазик, француски јазик, турски јазик, аритеметика, геометрија, географија, општа историја, зоологија, пеење, цртање, краснопис и фискултура.
Многу учители во вевчанското училиште во овој период отстапувале од пропагандните цели за кои биле поставени и делувале како апостоли во будење на културното и националното осознавање и просветно издигнување на населението (Аргир Маринов, Клија Самарџиева, Деспина Василева).
Мешовитото егзархиско училиште "Свети Спас" од програмски и педагошки аспект било добро организирано, со наставен план, наставна програма, а црковно - училишниот одбор се грижел за сите училишни проблеми и воопшто за работата на училиштето.
Од 1980 година до 1909 година учителите се исклучиво од Вевчани. Училишната зграда станува претесна за учениците, затоа се учело и во "магазата" на Ставре Попоски. Тоа било причина Вевчани во 1931 година да изгради нова училишна зграда (денешната зграда на Здравствениот дом) која за време на војната е опустошена и онеспособена да ја обавува својата функција подоцна во слободата.
Во октомври 1944 година - слободен македонски збор, писмо и песна во вевчанското училиште, но повторно во црковната стара школа и приватна стара куќа.
Во февруари 1945 година го добива името на народниот херој - Страшо Пинџур.
Во 1947 и 1948 година, вевчанци со свои средства и доброволна работна рака повторно им изградија велелепна училишна зграда на своите деца.
И денес наставата се одвива во тој објект кој и покрај постојаната грижа на учителите да го оддржуваат, реновираат - откажува и претставува опасност за безбедноста на сите учесници во процесот на настава, а просторната ограниченост ја кочи дејноста што отсекогаш била света за луѓето во Вевчани. Го кочи стремежот за одот напред - редовно присутен во Вевчанското училиште, кое:
- во 1957/58 учебна година како едно од петте експериментални училишта во Македонија за реформирана настава ја добива првата републичка награда;
-во учебната 1985/86 година добива (општинска) Осмоноемвриска награда;
-во учебната 1992/93 година е прогласено за најдобро основно училиште во Македонија, од страна на Синдикатот на просветните работници, а по предлог на Педагошкиот завод на Македонија.
Успесите, растежот на училиштето во Вевчани е незапирлив и безграничен процес. Секоја учебна година се поставува цел - што треба да се постигне и на кој начин.
Стратегијата на училиштето е создавање на ефикасно модерно училиште, со:
- ученикот како централна точка ставен во активна позиција и со почитување на индивидуалните разлики;
- наставникот како планер, дизајнер, осмислувач на воспитно - образовниот процес;
- целосна компјутеризација на наставата;
- со валоризација на воспитната функција;
- со истражувачки проекти;
- со влез на иновации;
- со отворени врати за родителите;
Примената на современи наставни форми и методи резултира трајни, применливи знаења кај учениците кои без ислучок со успех го продолжуваат и завршуваат средното училиште, а потоа многумина и факултети. Образовани, трудољубиви и чесни, му се враќаат на Вевчани, способни со своите знаења со сигурност да чекорат во животот и да ги решат проблемите на кои наидуваат.
Десетици и десетици лекари, инженери, професори и разни други високообразовни профили се гордоста на ова училиште што им ги поставило здравите темели за креативност, индивидуална надградба и високи морални вредности.
Контакт информации:
ОУ„Страшо Пинџур“ Вевчани
Директор: Г-дин Марјан Костојчиноски
Адреса: 6335 Вевчани
Телефон: 046/ 798-279
е-маил: oustrasopindzur@ymail.com